難得去旅行，梗係想帶埋部菲林相機出發，影啲靚相做紀念，但大家又知唔知，原來X光有機會影響菲林嘅表現？近年各地為咗防範恐襲，機場嘅X光機相繼轉用高強度嘅CT掃描儀，換句話講，無論你係寄艙定手提，菲林都要經過高輻射嘅掃描檢查。

「到底會有咩影響？」
根據國際影像工業協會嘅調查報告，霧化、陰影區域失真扭曲、隨機條紋、喪失細節以及畫質變差，都係X光機對菲林可能造成嘅影響。當中高感光度菲林（例如 800、1600 ISO）相對更加容易受影響，效果可以睇返相片先知。

「我試過無事喎，唔怕啦？」
大家Google一下就會發現，有人回報佢哋嘅菲林過咗X光機都安然無恙。其實原因可以理解為：以往嘅X光機型號，X射線值較低、穿透力亦較弱，所以以前會貼上「Film safe」告示，話ISO 1600／800以下嘅菲林過機都算安全。不過今時唔同往日，舊規則已經唔再適用，不能用以前嘅經驗去判斷今日情況。

「過得越多會點？」
過X光機嘅次數都係一個影響菲林嘅因素。例如轉機：由出境到抵達轉機站，已經過咗兩次X光機；回程再過兩次，一啲菲林已經累計被掃四次，輻射量亦會相應累積，風險自然增加。

「所以要點做先安全？」
坊間有啲鉛製嘅防X光保護袋可以購買，但而家嘅X光機會自動調節掃描功率，保護袋實際效果點都要睇機場同機型，未必有絕對保證，可以當係額外防護。

總括嚟講，路在口邊，無論係寄艙定手提，每個國家、甚至每個機場用嘅X光機都唔同，實在冇辦法一概而論講「ISO幾多就一定安全」，所以我哋建議你可以同安檢人員友善啲溝通，試下要求人手檢查，唔過機。

小Tips！
– 手提行李帶埋上機，要求人手檢查，菲林放入透明袋，方便安檢人員肉眼檢查，既快捷又清晰。
– 可以配合防X光保護鉛袋，多重防護，更安心。
– 乜都唔理，就當X光機幫你整啲「實驗性特效」LOL?

如果有進一步疑問，都可以DM問我哋～